Azərbaycan həyat keyfiyyəti hesabatında
İqtisadçı Rövşən Ağayev Müstəqil Dövlətlər Birliyi (MDB) ölkələrində həyat keyfiyyəti üzrə hesabata nəzər salıb. O yazır ki, MDB-nin rəsmi statistika qurumunun 2018-2021-ci illərə dair hesabatına görə, Ermənistan, Rusiya, Ukrayna, Belarus, Moldova, Qazaxıstan, Qırğızıstan, Tacikistan və Özbəkistanın da yer aldığı siyahıda Azərbaycan adambaşına ümumi daxili məhsul baxımından 4-cü yerdə, orta aylıq əməkhaqqı baxımından 6-cı yerdədir.
Ekspert Azərbaycanın MDB məkanında Türkmənistan və Tacikistanla birgə ölkədə sosial təbəqələşmənin real mənzərəsini əks etdirən Gini əmsalı barədə bilgi açıqlamayan ölkələr sırasında olduğunu vurğulayır: “Digər ölkələr içərisində Gini əmsalının ən yüksək səviyyəsi Rusiyadadır – 0,408 (0 tam bərabərliyi, 1 qeyri-bərabərliyi əks etdirir). Rəsmi hesabata əsasən, Rusiyada ən zəngin 20 faiz və ən yoxsul 20 faiz əhali qrupu arasında gəlir fərqi 9 dəfəyə yaxındır.
Minimum pensiya məbləğinin pensiyaçıların yaşayış minimumuna nisbətinin ən yüksək olduğu ölkə Qazaxıstandır – 176 faiz. Bu göstərici Belarusda 168 faiz, Azərbaycanda 123,5 faiz olub”.
