Suallar, hesabat istəyi
İqtisadçı, Azərbaycan Demokratiya və Rifah Partiyasının sədri Qubad İbadoğlu yazır ki, işğaldan azad ərazilərin bərpasına 2022-ci ilin dövlət büdcəsindən 2 milyard 670 milyon manat proqnozlaşdırılmışdı: “Ancaq büdcənin faktiki icrasına dair ilkin məlumatlara görə, bu məqsəd üçün ötən il 4 milyard 315 milyon manat xərclənib. Proqnozlaşdırılandan artıq xərclənmiş 1 milyard 645 milyon manat vəsaitin mənbələri büdcənin başqa xərcləri olub. Məsələn, bu məqsədlə səhiyyə xərclərindən 291 milyon manat, sosial müdafiə xərclərindən 265 milyon manat, təhsil xərclərindən 190 milyon manat, müdafiə xərclərindən 189 milyon manat kəsilib.
Sual olunur, nədən hökumət həkimlərin, müəllimlərin, hərbçilərin maaşından, pensiyalardan, müavinətlərdən kəsib işğaldan azad ərazilərdə hesabatsız, qeyri-şəffaf xərclərə yönəldib? Məqsəd torpaqları tez bərpa etməkdir, yoxsa ərazini şirkətlərin pul qazanması üçün xüsusi zonaya çevirib korrupsiya üçün əlverişli məkan yaratmaq? Niyə ötən il xərclənmiş 4 milyard 315 milyon manat vəsaitə dair hesabat verilmir?
Şübhəli və qeyri-şəffaf tenderlərin keçirilməsinin nəticəsidir ki, 2021 və 2022-ci illərdə işğaldan azad olunmuş ərazilərin bərpası və tikintisinə dövlət büdcəsindən 6,5 milyard manat xərclənsə də, bu günədək əraziyə bir ovuc ailə köçürülüb”.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib. 2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlarla Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı rayonları və keçmiş Ağdərə rayonu qismən azad olunub.
