Gömrük Komitəsinə sədr təyin edildi
Şahin Soltan oğlu Bağırov Dövlət Gömrük Komitəsinin sədri təyin edilib. Prezident İlham Əliyev sərəncamı fevralın 14-də imzalayıb. 2022-ci il iyulun 18-dən sədrin birinci müavini postunu tutan gömrük xidməti general-leytenantı Şahin Bağırova sədr vəzifəsinin müvəqqəti icrası həvalə olunmuşdu.
Novator.az bildirir ki, 1965-ci il təvəllüdlü Şahin Bağırov Voronej Dövlət Universitetinin (Rusiya) iqtisadiyyat fakültəsini, Rusiya Gömrük Akademiyasının gömrük işinin təşkili fakültəsini, həmin təhsil ocağının aspiranturasını bitirib. İqtisad elmləri namizədidir.
1992-ci ildən gömrük sistemində xidmət edib, komitə sədrinin müavini vəzifəsinə qədər yüksəlib.
2019-2022-ci illərdə Vergilər Nazirliyində və İqtisadiyyat Nazirliyi yanında Əmlak Məsələləri Dövlət Xidmətində fəaliyyət göstərib.
1992-ci il yanvarın 30-da yaradılan Gömrük Komitəsinə indiyə qədər bu şəxslər sədrlik edib: Maqsud Məmmədov, Tofiq Kərimov, İbrahim Vəliyev, Tahir Əliyev, Kəmaləddin Heydərov, Aydın Əliyev, Səfər Mehdiyev.
