Məhbus cəbhəçi niyə aclıq edir?
Bakının Şüvəlan qəsəbəsindəki 3 saylı İstintaq Təcridxanasında saxlanan AXCP üzvü Mütəllim Orucov fevralın 12-dən aclıq aksiyası keçirir. “Turan”a danışan vəkil Nemət Kərimli deyib ki, Mütəllim Orucov gərəkli tibbi yardım ala bilmədiyini bəyan edib.
Koronavirus xəstəliyi keçirmiş məhbusun ağ ciyərlərində problemlərdən, yüksək təzyiqdən, başqa problemlərdən əz əziyyət çəkdiyi, saxlanma şəraitinin yaxşı olmadığı vurğulanır.
2021-ci il iyunun 1-də Almaniyadan deportasiya olunan cəbhəçi həmin il oktyabrın 22-də Qubada tutularaq Bakıya gətirilib, satış məqsədi ilə qanunsuz olaraq külli miqdarda narkotik vasitə saxlama ittihamı ilə həbs edilib. 2022-ci il oktyabrın 21-də Sumqayıt Ağır Cinayətlər Məhkəməsi ona 7 il müddətinə azadlıqdan məhrumetmə cəzası kəsib. Sumqayıt Apellyasiya Məhkəməsi hökmdən verilən şikayətə baxır.
Mütəllim Orucov ittihamı qəbul etmir və siyasi sifariş sayır. Bir neçə il Almaniyada yaşamış Mütəllim Orucov orada Azərbaycandakı siyasi məhbusların müdafiəsinə həsr olunmuş etiraz aksiyalarında fəal iştirakı ilə tanınıb.
