Sabiq nazir həbsə gedir?
Ermənistanın Baş Prokurorluğu sabiq müdafiə naziri Vigen Sərkisyanı cinayət məsuliyyətinə cəlb edib. Fevralın 9-da yayılan rəsmi məlumata görə, məhkəməyə təqdimatda sabiq nazir barəsində həbs qətimkan tədbirinin seçilməsi istənir.
İttihama əsasən, Vigen Sərkisyan 2018-ci ildə vəzifə səlahiyyətlərini aşaraq paytaxt Yerevanda hərbi qulluqçular üçün tikilmiş çoxmərtəbəli binadakı 29 mənzilin bölgüsünü müvafiq hökumət komissiyası ilə razılaşdırmadan aparıb, dövlətin mənafeyinə ziyan vurub.
Novator.az bildirir ki, 1975-ci il təvəllüdlü Vigen Sərkisyan 2016-cı ilin oktyabrından 2018-ci il mayınadək müdafiə naziri olub.
O, 1995-1998-ci illərdə Ermənistan parlamenti sədrinin köməkçisi, 2003-2009-cu illərdə Ermənistan prezidentinin köməkçisi, 2009-2011-ci illərdə Prezident Administrasiyası rəhbərinin müavini vəzifələrini tutub, 2011-ci ildən Prezident Administrasiyasına rəhbərlik edib.
2000-2003-cü illərdə müdafiə nazirinin referenti kimi hərbi xidmət keçib.
