Hava məlumatı
Milli Hidrometeorologiya Xidməti bildirir ki, fevralın 8-i Bakıda temperatur iqlim normasından 1,5 dərəcə aşağı olub, paytaxtda və Abşeron yarımadasında 1 dərəcəyədək şaxta qeydə alınıb.
Məlumata görə, Naxçıvan Muxtar Respublikasında 10 dərəcəyədək, dağlıq rayonlarda 10-15 dərəcə şaxta, aran rayonlarında 1 dərəcə şaxtadan 1 dərəcəyədək isti müşahidə olunub.
Bəzi yerlərdə qar yağdığı, qarın qalınlığının Qaxda 46, Şəkidə 23, Lerikdə 11, Qusarda 10, Şamaxı və Qubada 9, Şahbuz və Gədəbəydə 8, Daşkəsəndə 7, Göygöldə 4, Oğuzda 3, Qobustanda 2, Naxçıvan, Qəbələ, Zaqatala, Xaçmaz, İsmayıllı və Astarada 1 santimetrə çatdığı vurğulanır.
Fevralın 10-na olan proqnoza əsasən, Bakıda və Abşeron yarımadasında gecə arabir qar yağması, gecə 1-3 dərəcə şaxta, gündüz 1-3 dərəcə isti gözlənir. Rayonlar üçün temperatur proqnozu gecə 3 dərəcə şaxtadan 2 dərəcəyədək isti, gündüz 3-7 dərəcə isti, dağlarda gecə 12-17, gündüz 2-7 dərəcə şaxtadır.
