Bakıda orta maaş 1100 manatı döyür
Bakı Şəhər Statistika İdarəsi makroiqtisadi hesabat yayıb. Məlumata görə, paytaxtda muzdlu işçilərin orta aylıq nominal əməkhaqqı 2022-ci il dekabrın 1-nə 1067,5 manata çatıb.
Novator.az bildirir ki, rəsmi açıqlamaya əsasən, paytaxtın müəssisələri və fərdi sahibkarları ötən il 75,2 milyard manatlıq, 2021-ci illə müqayisədə 0,9 faiz az sənaye məhsulu istehsal edib.
Əsas kapitala 10 milyard 203 milyon manat məbləğində, 2021-ci ilə nəzərən 0,2 faiz çox vəsait yönəldildiyi vurğulanır.
Pərakəndə ticarət şəbəkəsində 5 faiz yüksəlişin qeydə alındığı, əhaliyə göstərilən ödənişli xidmətlərdən gəlirin 9,1 faiz artdığı qeyd olunur, ictimai iaşə dövriyyəsi üzrə artım 44,2 faiz göstərilir.
Hesabata əsasən, istehlak qiymətləri 2021-ci illə müqayisədə 13,4 faiz artıb, ərzaq məhsulları, içkilər və tütün məmulatları 17,8 faiz, qeyri-ərzaq malları 9,5 faiz, ödənişli xidmətlər 10,8 faiz bahalaşıb.
