Avropa Məhkəməsindən İbrahimbəyov qərarı gəlir
Avropa İnsan Hüquqları Məhkəməsi fevralın 16-da Azərbaycandan şikayətlər üzrə qərarlar elan edəcək. Xəbəri yayan Aihmaz.org bildirir ki, nasir, dramaturq, ssenarist və rejissor Rüstəm İbrahimbəyov (2022-ci ildə vəfat edib), Şöhrət İbrahimbəyova və Lalə Əfəndiyeva Avropa Məhkəməsinə torpaq sahəsinin əllərindən qanunsuz alınması iddiası ilə üz tutublar. Torpaq sahəsi 2012-ci ildə, Dövlət Neft Şirkətinə aid olması əsas gətirilərək alınıb, yerli məhkəmələrdə çəkişmələr fayda verməyib.
Rüstəm İbrahimbəyov 2009-cu ildən Azərbaycan hakimiyyətini sərt tənqid edib, bir müddət müxalif fəaliyyəti ilə tanınıb.
AXCP üzvü olmuş Elnur Məcidli 2011-ci ilin aprelində Bakıda keçirilmiş aksiyada tutularaq 2 il müddətinə azadlıqdan məhrum edilməsindən şikayətçidir.
Qafqaz Media Araşdırmaları Mərkəzinin şikayəti ictimai birliyə açılmış cinayət işi çərçivəsində bank hesablarına həbs qoyulması ilə bağlıdır. Aynurə (Aynur) İmranova, Reportyorların Azadlıq və Təhlükəsizlik İnstitutu, Emin Hüseynov, Milli və Beynəlxalq Araşdırmalar Mərkəzi də bir sıra ictimai birliyə və şəxsə qarşı cinayət işi çərçivəsində bank hesablarına həbs qoyulmasından şikayət veriblər.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
