Ohanyan cinayət məsuliyyətinə alınır
Ermənistan parlamentinin müxalif deputatı, sabiq müdafiə naziri Seyran Ohanyan cinayət məsuliyyətinə alınır. Novator.az-ın məlumatına görə, parlamentin 7 fevral iclasında təqdimatla çıxış edən baş prokuror Anna Vardapetyan deyib ki, Seyran Ohanyan 2005 və 2009-cu illərdə Ararat vilayətində hərbi hissələrə məxsus iki torpaq sahəsinin qanunsuz satılmasında şübhəli bilinir.
Deputatın cinayət məsuliyyətinə alınması üçün parlamentin razılığı gərəkdir.
Seyran Ohanyan 1962-ci ildə Azərbaycanın Qarabağ bölgəsində, Şuşa rayonunda doğulub. Bakı Ali Ümumqoşun Komandirləri Məktəbini bitirib. Azərbaycan torpaqlarının işğalının və soyqırımı cinayətlərinin rəhbərlərindən biridir. 1999-cu ildən Dağlıq Qarabağ rejiminin “müdafiə naziri” olub. 2007-ci ildən Ermənistan Silahlı Qüvvələri Baş Qərargahının rəisi, 2008-2016-cı illərdə müdafiə naziri postlarını tutub. General-polkovnikdir.
2021-ci ildən parlamentin deputatıdır.
