Cəbhəçidən aclıq xəbəri
Daxili İşlər Nazirliyinin Bakıdakı inzibati həbs məntəqəsində (Binəqədi rayonu) saxlanan AXCP fəalı Elnur Həsənov aclıq aksiyası keçirir. Fevralın 6-da Elnur Həsənova baş çəkən vəkil Fəxrəddin Mehdiyev “Turan”a deyib ki, cəbhəçi qanunsuz həbs olunduğunu bildirir, azadlığa buraxılmasını tələb edir.
Vəkilin sözlərinə görə, Elnur Həsənov aclığa tutulduğu gün – yanvarın 31-də başlayıb, fevralın 2-dək su da içməyib.
Fəal vəkilə saxlanma şəraitindən gileylənib, ailə üzvləri ilə telefonla danışmasına imkan verilmədiyini deyib.
Yanvarın 29-da Sabunçu Elektrik Şəbəkəsinin Bakıxanov qəsəbəsindəki ofisinə gedən Elnur Həsənov 85 yaşlı nənəsinin evində elektrik enerjisinin yanvarın 26-dan cüzi borca görə kəsilməsinə etiraz edib. Məsələ həllini tapmadığı üçün Elnur Həsənov yanvarın 31-də “Azərişıq” ASC-nin Yasamal rayonundakı baş ofisinə gedib, orada tutularaq Yasamal Rayon Məhkəməsinə aparılıb və polis əməkdaşının qanuni tələbinə qəsdən tabe olmamaqda təqsirli bilinərək 30 sutka inzibati həbs cəzası alıb.
Elnur Həsənov İkinci Qarabağ müharibəsinin şəhidi Teymur Həsənovun qardaşıdır.
