Ünvanlı yardım statistikası
Respublikaçı Alternativ Partiyasının sədri İlqar Məmmədov bir daha rəsmi statistikaya əsaslanaraq ünvanlı dövlət sosial yardımı alanların sayını əhalinin sayı ilə tutuşdurub. Novator.az-ın məlumatına görə, siyasətçi yazır ki, Yardımlıda əhalinin 9,2 faizi, Salyan və Tovuzda 7,6 faizi, Mingəçevirdə 7,1 faizi, Göygöldə 6,8 faizi, Lənkəranda 6 faizi, Goranboyda 5,5 faizi, Masallıda 4,8 faizi, Beyləqanda 4,7 faizi, Bərdədə 4,6 faizi, Sumqayıtda 4,5 faizi, Şirvan şəhərində 4,2 faizi ünvanlı yardım alır. Oğuzda bu göstərici 0,9 faiz, Göyçayda 0,7 faiz, İsmayıllı, Qax və Zaqatalada 0,6 faiz, Qəbələdə 0,5 faiz, Zərdabda 0,3 faiz, Balakən və Qobustanda 0,2 faizdir.
“Ünvanlı dövlət sosial yardımı haqqında” qanuna əsasən, sosial yardım orta aylıq gəliri onlardan asılı olmayan səbəblərdən (ailə üzvlərinin əmək qabiliyyətsiz olması, ailənin əmək qabiliyyətli üzvünün birinci dərəcə əlilliyi olan şəxsə, 8 yaşına çatmamış uşağa və ya sağlamlıq imkanları məhdud 18 yaşınadək uşağa qulluq etməsi, 23 yaşınadək əyani təhsil alması, müvafiq icra hakimiyyəti orqanında dövlət orqanının və ya hüquqi şəxsin ləğv edilməsi və ya işçilərin sayı və ya ştatların ixtisar edilməsi ilə əlaqədar işsiz kimi qeydə alınması, vəfat etməsi, məhkəmə qərarı ilə itkin düşmüş və yaxud ölmüş hesab edilməsi, azadlıqdan məhrum edilməsi, ailə üzvünün olduğu yerin məlum olmaması) hər bir ailə üzvü üçün ehtiyac meyarının məcmusundan aşağı olan aztəminatlı ailələrə verilir.
2023-cü il üçün ünvanlı dövlət sosial yardımının təyin edilməsi məqsədilə ehtiyac meyarının həddi 246 manat götürülüb.
Dövlət Sosial Müdafiə Fondunun 6 fevral məlumatına əsasən, yanvar ayında bir ailəyə ödənən ünvanli dövlət sosial yardımının orta məbləği 397,2 manat olub.
