Abid Qafarov bəraət gözləyir
Ali Məhkəmə KİM TV internet kanalının qurucusu Abid Qafarovun şikayəti üzrə qərar verməyə hazırlaşır. Vəkil Aqil Layicin yaydığı məlumata görə, yekun proses fevralın 16-na təyin olunub.
Azadlıqdan məhrum edilmiş jurnalist Ali Məhkəmədən bəraət qərarı istəyir.
Novator.az bildirir ki, 1981-ci il təvəllüdlü Abid Qafarov Azərbaycan Dövlət Neft və Sənaye Universitetini bitirib. İctimai fəaliyyəti, jurnalist araşdırmaları ilə tanınıb.
Yasamal Rayon Məhkəməsi 2022-ci il iyulun 13-də Abid Qafarovu bir qrup qaziyə böhtan atmaq və onları təhqir etməkdə təqsirli bilərək 1 il müddətinə azadlıqdan məhrum edib. Abid Qafarov məhkəmə zalında tutulub.
İkinci Qarabağ müharibəsi qazilərinin xüsusi ittiham qaydasında şikayətlərində Abid Qafarovun KİM TV-də müharibə veteranlarını öz hüquqları uğrunda mübarizə aparmamaqda, çarəsizlikdən ağızlarını tikməkdə, özlərini yandırmaqda, itaətkarcasına davranmaqda qınadığı əsas gətirilib.
Cinayət Məcəlləsinin 147 və 148-ci maddələrinə əsasən, böhtan və təhqir maksimum 6 ayadək müddətə azadlıqdan məhrumetmə cəzası nəzərdə tutur. Abid Qafarova 1 il həbs cəzaların toplanması üsulu ilə verilib.
Avqustun 30-da Bakı Apellyasiya Məhkəməsi cəzanı qüvvədə saxlayıb.
Abid Qafarov azadlıqdan məhrum edildi
