Ünvanlı yardım əhali güzgüsündə
Respublikaçı Alternativ Partiyasının sədri İlqar Məmmədov Bakının rayonlarında ünvanlı dövlət sosial yardımı alanların sayını əhalinin sayı ilə tutuşdurub. Novator.az-ın məlumatına görə, siyasətçi yazır ki, Nəsimi rayonunda hər 840 nəfərdən biri, Qaradağ rayonunda hər 55 nəfərdən biri yardım alır.
Nərimanov rayonunda bu göstərici 465, Səbail rayonunda 461, Yasamal rayonunda 452, Xətai rayonunda 431, Nizami rayonunda 333, Pirallahı rayonunda 235, Suraxanı rayonunda 161, Binəqədi rayonunda 158, Sabunçu rayonunda 100, Xəzər rayonunda 76-dır.
Siyasətçi əlavə edir ki, paytaxta bitişik Abşeron rayonunda hər 74 nəfərdən birinə ünvanlı yardım təyin olunub.
“Ünvanlı dövlət sosial yardımı haqqında” qanuna əsasən, sosial yardım orta aylıq gəliri onlardan asılı olmayan səbəblərdən (ailə üzvlərinin əmək qabiliyyətsiz olması, ailənin əmək qabiliyyətli üzvünün birinci dərəcə əlilliyi olan şəxsə, 8 yaşına çatmamış uşağa və ya sağlamlıq imkanları məhdud 18 yaşınadək uşağa qulluq etməsi, 23 yaşınadək əyani təhsil alması, müvafiq icra hakimiyyəti orqanında dövlət orqanının və ya hüquqi şəxsin ləğv edilməsi və ya işçilərin sayı və ya ştatların ixtisar edilməsi ilə əlaqədar işsiz kimi qeydə alınması, vəfat etməsi, məhkəmə qərarı ilə itkin düşmüş və yaxud ölmüş hesab edilməsi, azadlıqdan məhrum edilməsi, ailə üzvünün olduğu yerin məlum olmaması) hər bir ailə üzvü üçün ehtiyac meyarının məcmusundan aşağı olan aztəminatlı ailələrə verilir.
2023-cü il üçün ünvanlı dövlət sosial yardımının təyin edilməsi məqsədilə ehtiyac meyarının həddi 246 manat götürülüb.
