Azərbaycanın İrandakı səfirliyinə silahlı hücum olub. Xarici İşlər Nazirliyinin məlumatına görə, yanvarın 27-si, Bakı vaxtı ilə saat 8:30 radələrində Tehrandakı səfirliyə hücum edən şəxs “Kalaşnikov” markalı avtomat silahla mühafizə postunu yarıb, mühafizə xidmətinin rəisini qətlə yetirib. Səfirliyin iki mühafizəçisi yaralanıb.

Basqınçı ilə əlbəyaxa olan səfirliyin əməkdaşı onu tutaraq zərərsizləşdirib.

İranda fövqəladə və səlahiyyətli səfir postunu Əli Fikrət oğlu Əlizadə tutur. O, eyni zamanda İqtisadi Əməkdaşlıq Təşkilatı yanında daimi nümayəndədir.