Mehmanxana statistikasının sualları
İqtisadçı, Respublikaçı Alternativ Partiyasının funksioneri Natiq Cəfərli mehmanxana biznesi üzrə rəsmi statistikaya nəzər salıb.
Hesabata görə, 2022-ci ildə mehmanxana və bu tipli obyektlərdə gecələmə sayı 2021-ci illə müqayisədə 1,5 dəfə, sahənin gəlirləri 1,7 dəfə artıb.
İllik gəlir 355,3 milyon manat göstərilir.
Qeyd olunur ki, 2022-ci ildə obyektlərin birdəfəlik tutumundan istifadə 15,7 faiz səviyyəsində rəsmiləşib. Bu göstərici Şabranda 80,1 faiz, Naftalanda 37,6 faiz, Qubada 27,8 faiz, Beyləqanda 26,2 faiz, Lənkəranda 24,1 faiz, Bakıda 23,8 faiz, Ağcabədidə 20 faiz, Qəbələdə 19,7 faiz, Şuşada 16,7 faiz, Sabirabadda 16,2 faiz, qalan şəhər və rayonlarda ölkə üzrə orta göstəricidən aşağı olub.
Novator.az-ın məlumatına görə, Natiq Cəfərli yazır ki, rəsmi statistika 2022-ci ildə mehmanxanalarda hər 100 otaqdan az qala 85-nin boş qaldığını etiraf edir: “Bu da ölkədə turizmin vəziyyəti. Dünyada qəbul olunmuş normalara əsasən, il boyu ortalama heç olmasa 55-60 faiz dolmayan hotel ziyanla işləmiş sayılır. Məmur biznesi olan hotelçilik başqa cür işləyə də bilməzdi.
Rəsmi statistika ortaya iki sual çıxarır. Hotellər boş qalırsa, qiymətlər niyə düşmür?
Bəlkə bu qədər aşağı göstərici rəsmiləşdirmə problemidir? Yəni ailə-məmur biznesi olan böyük hotellər vergidən yayınmaq üçün qonaq sayını aşağı göstərir, rəsmiləşdirmə olmur.
Bu suallara cavab verə biləcək kimsə varmı?”
