Bolqarıstan parlamenti buraxılır
Bolqarıstan növbədənkənar parlament seçkisinə gedir. Novator.az-ın məlumatına görə, yanvarın 24-də milli televiziya ilə xalqa müraciət edən prezident Rumen Radev fevralın 3-də parlamenti buraxacağını, aprelin 2-nə parlament seçkisinin təyin olunacağını deyib.
2022-ci il oktyabrın 2-də seçilmiş parlamentə GERB Partiyası ilə müttəfiqi Demokratik Qüvvələr İttifaqı, Yeniliklərə Davam Partiyası, Hüquq və Azadlıq Hərəkatı, Dirçəliş Partiyası, Sosialist Partiyası, Demokratik Bolqarıstan Partiyası və Bolqar Üsyanı Partiyası mandatlar alıb, ancaq heç bir qüvvə hökumət formalaşdıra bilməyib.
Proporsional üsulla (partiya siyahıları üzrə) seçilən Bolqarıstan parlamenti 240 deputatdan ibarətdir. Hökumət qurmaq üçün 121 mandat gərəkdir.
2021-ci il aprelin 4-də və iyulun 11-də keçirilmiş parlament seçkilərindən sonra hökumət qurmaq mümkün olmayıb. 14 noyabr 2021-ci il seçkisindən sonra qurulan hökumət isə 2022-ci il iyunun 22-də dağılıb.
Parlament respublikası olan Bolqarıstanda dövlət başçısı funksiyasını prezident yerinə yetirir. Sosialist Partiyasının təmsilçisi Rumen Radev 2016 və 2021-ci illərin ümumxalq seçkilərində qalib gəlib.
