Təhsilə hikkə əngəli
2022-ci il iyulun 22-də prezident İlham Əliyev “Azərbaycan Respublikasının 2022-2026-cı illərdə sosial-iqtisadi inkişaf strategiyası”nı təsdiqləyib. Novator.az-ın məlumatına görə, London İqtisadiyyat Məktəbinin professoru, Azərbaycan Demokratiya və Rifah Partiyasının sədri Qubad İbadoğlu yazır ki, strategiyada nəzərdə tutulan məqsədlərdən biri 21-ci əsrin tələblərinə uyğun təhsildir: “İlk 800-lükdə təmsil olunan Azərbaycan universitetlərinin sayının 2026-cı ilə qədər 3-ə çatdırılması hədəf kimi göstərilir. Universitetlərin beynəlxalq reytinqinə təsir göstərən amillərdən biri də xarici universitetlərlə və onların professor-müəllim heyəti ilə əməkdaşlıqdır.
Eyni hədəflər Mərkəzi Asiyada da aktualdır. Qazaxıstan və Qırğızıstanın aparıcı universitetlərində doktorluq proqramı üzrə oxuyanlardan xeyli müraciət almışam, məndən elmi məsləhətçisi olmağıma razılıq istəyirlər.
Azərbaycandakı universitetlərin birindən belə bir sorğu alanda cavab yazdım ki, rəhbərliklə məsləhətləşin, sonra davam edək. Düşündüm ki, rəhbərlik razı olsa, bu yolla biliklərimi vətəndə olan tələbələrlə də paylaşa bilərəm. Amma elə o vaxtdan əlaqə kəsildi, görünür, rəhbərlik məsləhət bilmədi.
London İqtisadiyyat Məktəbi dünyanın nüfuzlu təhsil ocağıdır, yəqin ki, onunla əməkdaşlıqdan daha çox qarşı tərəf faydalana bilər, amma görünür, qazaxlar və qırğızlar dəyərləndirməyi bacarır, Azərbaycandakı siyasi hikkə bunun fərqinə varmır”.
1971-ci il təvəllüdlü Qubad İbadoğlu 1996-cı ildən pedaqoji fəaliyyətlə məşğuldur. Əvvəllər Azərbaycan Dövlət İqtisad Universitetində və Ratqers Universitetində (ABŞ) dərs deyib.
