Mövsüm Səmədov azadlıqda
Dövlət qeydiyyatı olmayan Azərbaycan İslam Partiyasının sabiq sədri Mövsüm Səmədov həbsdən buraxılıb. Xəbər yanvarın 19-da yayılıb.
2011-ci ilin yanvarında tutulan Mövsüm Səmədov hakimiyyəti zorla ələ keçirmə cəhdi və başqa ağır cinayətlərdə təqsirli bilinərək 12 il müddətinə azadlıqdan məhrum olunmuşdu. Müdafiəçiləri həbsi siyasi xarakterli sayıb və əsasən Azərbaycan İslam Partiyası Baş Məclisinin 2 yanvar 2011-ci il iclasındakı çıxışı ilə bağlayıb. Mövsüm Səmədov həmin çıxışında məktəblərdə hicaba qadağa qoyulmasını kəskin pisləyib və hakimiyyətin ünvanına ittihamlar səsləndirib. Məhəmməd peyğəmbərdən “dinə tərəf bəla gəlsə, canınızı verin, dininizi qurtarın” deyə sitat gətirən partiya lideri Azərbaycan xalqını “ayağa qalxmağa və zalım rejimə son qoymağa” çağırıb.
2019-cu il dekabrın 12-də Avropa İnsan Hüquqları Məhkəməsi Mövsüm Səmədovun şikayəti üzrə qərarını elan edərək ona Avropa İnsan Hüquqları Konvensiyası ilə verilmiş azadlıq və toxunulmazlıq, ədalətli məhkəmə araşdırması hüquqlarının pozulduğunu bildirib, Azərbaycan dövlətinə 4 min avro təzminat cəzası kəsib.
1965-ci il təvəllüdlü Mövsüm Səmədov Bakıda ali tibb təhsili, İranda dini təhsil alıb.
