Davos səfərində olan prezident İlham Əliyev yanvarın 18-də litvalı həmkarı Gitanas Nauseda ilə bir araya gəlib. AZƏRTAC xəbər verir ki, görüşdə regional məsələlər, Ermənistan-Azərbaycan münasibətlərinin normallaşdırılması və sülh müqaviləsi üzrə danışıqlar prosesi, Laçın yolunda durum barədə fikir mübadiləsi aparılıb, Azərbaycan-Avropa İttifaqı əlaqələrinə toxunulub.

İlham Əliyev “The Goldman Sachs Group İnc.” şirkətinin qlobal məsələlər üzrə prezidenti Cared Kohen, “Carlsberg Group” şirkətinin prezidenti və baş icraçı direktoru Kes t`Hart, “Kromatix SA” şirkətinin baş icraçı direktoru Rafik Hanbali, “Signify” (əvvəlki adı “Philips Lighting”) şirkətinin baş icraçı direktoru Erik Rondolat, BP Qrupunun baş icraçı direktoru Bernard Luni, BMT-nin Məskunlaşma Proqramının icraçı direktoru Maimuna Mohd Şərif ilə də görüşlər keçirib, həmçinin Davos Dünya İqtisadi Forumu çərçivəsində “Yeni enerji reallığının istiqamətləndirilməsi” mövzulu dəyirmi masada iştirak edib.

Latviya prezidenti Eqils Levitslə görüşdə Azərbaycan-Avropa İttifaqı əlaqələrinə toxunulub, Latviyanın Azərbaycanın Avropa İttifaqı ilə əlaqələrini daim dəstəklədiyi qeyd olunub, həmçinin Azərbaycanın Avropanın enerji təhlükəsizliyində və qaza tələbatının ödənməsində oynadığı rol yüksək qiymətləndirilib.

Söhbət zamanı Azərbaycanın Orta Dəhlizdə yerləşən ölkə olaraq Mərkəzi Asiya ilə Avropa İttifaqı arasında mühüm nəqliyyat daşımalarının həyata keçirilməsində önəmli rolu vurğulanıb.