İşğalçı rejimdə yeni təyinatlar
Azərbaycanın Yuxarı Qarabağ bölgəsindəki işğalçı rejimin “Milli Təhlükəsizlik Xidmətinin direktoru” dəyişib. Novator.az bildirir ki, rejimin başçısı Araik Arutunyanın yanvarın 16-da imzaladığı sənədlərlə Aşot Akopcanyanı Ararat Melkumyan əvəzləyib.
Ararat Melkumyan yanvarın 7-dən “Təhlükəsizlik Şurasının katibi” idi. Onun boşaldığı post Samvel Şahramanyana həvalə olunub.
İşğalçı rejimdə kadr yenilikləri 2022-ci ilin noyabr ayından aparılır. Proses noyabrın 4-də Ruben Vardanyanın “dövlət naziri” (hökumət başçısı) postuna təyinatı ilə başlayıb. 1968-ci ildə Ermənistanın paytaxtı Yerevanda doğulan Ruben Vardanyan Rusiyada sərmayə sektorunda fəaliyyət göstərən iş adamı kimi tanınıb, milyarderdir. O, 2022-ci il sentyabrın 1-də Qarabağa köçdüyünü açıqlayıb.
1988-ci ildə ermənilər Azərbaycanın Dağlıq (Yuxarı) Qarabağ vilayətinin Ermənistana verilməsi tələbi ilə separatçı hərəkata başlayıb, bu, getdikcə vüsət alaraq Ermənistanın açıq təcavüzünə çevrilib. 1991-ci ildə ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-cü il mayın 12-də elan olunan atəşkəsə qədər Ermənistan Azərbaycanın bütün cənub-qərbini ələ keçirib.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və bu əməliyyatlar nəticəsində əldə edilən razılaşmalarla ərazilərin böyük hissəsi azad olunub.
Yuxarı Qarabağa və bölgədən Ermənistana gedən Laçın yoluna Rusiyanın hərbi kontingenti nəzarət edir. Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi özünü “Dağlıq Qarabağ Respublikası” və ya “Arsax Respublikası” adlandıran işğalçı rejimin idarəçiliyindədir.
İşğalçı rejimdə 1991-ci ildən bəri 7 “parlament seçkisi”, 6 “prezident seçkisi”, 7 “bələdiyyə seçkiləri”, 3 “referendum” keçirilib.
Müxtəlif illərdə rejimə Leonard Petrosyan (iki dəfə), Artur Mkrtçyan, Georgi Petrosyan, Robert Köçəryan, Arkadi Qukasyan, Bako Saakyan rəhbərlik edib.
Araik Arutunyan rəhbərliyə 2020-ci il mayın 21-də gəlib.
