Seymur Həzi Ankaradadır
AXCP sədrinin müavini Seymur Həzi Türkiyənin paytaxtı Ankaradadır. Siyasətçinin həyat yoldaşı Nigar Həzi yanvarın 13-də Novator.az-a açıqlamasında belə deyib.
2022-ci ilin sonunda Gürcüstana gedən Seymur Həzi oradan Türkiyəyə yollanıb. Yanvarın 12-də Türkiyədən Gürcüstana qayıtmaq istəyən siyasətçi quru sərhədi keçərkən saxlanaraq geri qaytarılıb. Ona ölkəyə girişinin yasaqlandığı deyilib, ancaq heç bir səbəb göstərilməyib.
Nigar Həzinin sözlərinə görə, yoldaşı məcburiyyət qarşısında qalaraq Ankaraya dönüb.
1982-ci il təvəllüdlü Seymur Həzi Bakı Dövlət Universitetinin şərqşünaslıq fakültəsini (bakalavr və magistr dərəcələri ilə) və Azərbaycan Milli Elmlər Akademiyasının Fəlsəfə İnstitutunun aspiranturasını bitirib.
2014-2019-cü illərdə həbsdə yatıb.
Seymur Həzi həbsdə olarkən, 2016-cı ildə siyasətçi Tofiq Yaqublunun qızı Nigarla ailə qurub.
Müsavatçı Nigar Həzi 2012-2013-cü illərdə həbsdə olub.
