Fərdi sahibkarlar üçün sosial sığorta arayışı
2023-cü il yanvarın 1-dən Azərbaycanda muzdlu işçilərin minimum aylıq əməkhaqqı 300 manatdan 345 manata yüksəlib. Novator.az bildirir ki, yeni məbləğ fərdi sahibkarların Dövlət Sosial Müdafiə Fonduna ödənişlərini də artırır. Ödənişlər minimum əməkhaqqı məbləğinə bağlıdır. Sahibkarlıq fəaliyyəti üzrə minimum aylıq əməkhaqqının tikinti sahəsində 50 faizi, digər sahələrdə 25 faizi miqdarında ödəniş var. Bakı şəhərində 25 faiz miqdarının 100 faiz həddi, Sumqayıt və Gəncə şəhərlərində 90 faiz həddi, digər şəhərlərdə 80 faiz həddi, rayon mərkəzlərində və qəsəbələrdə 60 faiz həddi, kənd yerlərində 50 faiz həddi tətbiq olunur.
Bakı Araşdırmalar İnstitutu fərdi sahibkarların aylıq sosial sığorta ödənişləri ilə bağlı arayış yayıb. Qeyd olunur ki, tikinti sahəsində sahibkarlıq fəaliyyəti üzrə aylıq sosial sığorta ödənişinin məbləği 172,5 manatdır.
Digər sahələrdə sahibkarlıq fəaliyyəti üzrə ödənişlər belə sıralanır:
– Bakı şəhərində 86,25 manat;
Sumqayıt və Gəncə şəhərlərində 77,63 manat;
digər şəhərlərdə 69 manat;
rayon mərkəzlərində və qəsəbələrdə 51,75 manat;
kənd yerlərində 43,13 manat.
