Avropa Məhkəməsinin Azərbaycan qərarları
Yanvarın 12-də Avropa İnsan Hüquqları Məhkəməsi Azərbaycandan şikayətlər üzrə yeni qərarlar elan edib. Aihmaz.org xəbər verir ki, dövlət qeydiyyatına alınmamaqdan şikayətlənən Seçkilərin Monitorinqi və Demokratiyanın Tədrisi Mərkəzinin, qurumun təsisçiləri Anar Məmmədli ilə Bəşir Süleymanlının ərizələrini araşdıran məhkəmə Avropa İnsan Hüquqları Konvensiyası ilə qorunan birləşmək hüququna müdaxilənin baş verdiyi, habelə fərdi şikayət hüququna hörmət göstərilmədiyi qənaətinə gəlib. Qərara əsasən, Azərbaycan dövləti ərizəçilərə 4700 avro, hüquqi təmsilçisi İntiqam Əliyevə 500 avro ödəməlidir.
Miriyev və başqaları məhkəmə qərarlarının icra edilməməsindən şikayətçi olublar. Dövlətlə anlaşmaya əsasən, yeddi ərizəçinin hər birinə 2050 avro, iki ərizəçinin hər birinə 3850 avro, bir ərizəçiyə 2650 avro, bir ərizəçiyə 1750 təzminat ödənəcək, yerli məhkəmələrin icrası mübahisələndirilən qərarları icra ediləcək.
Səmədov şikayətində ictimai toplantı iştirakçılarına qarşı qeyri-mütənasib tədbirlərin görüldüyünü, birləşmək və ədalətli məhkəmə araşdırması hüquqlarının pozulduğunu iddia edib. Dövlət pozuntuları etiraf edib, ərizəçiyə 2850 avro ödəməyə boyun olub.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarətə məsuldur.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
