İlham Əliyev: BMT-ni necə dəyişməli?
Prezident İlham Əliyev Azərbaycan televiziyalarına 10 yanvar müsahibəsində Birləşmiş Millətlər Təşkilatında (BMT) islahatlara, Təhlükəsizlik Şurasının tərkibinə yenidən baxmağa çağırış edib: “Təhlükəsizlik Şurasında yeni üzvlər olmalıdır. Mütləq bir daimi yer müsəlman ölkəsi üçün ayrılmalıdır və bunu İslam Əməkdaşlıq Təşkilatı özü müəyyən etməlidir. Bir yer də Qoşulmama Hərəkatına verilməli və qurumda sədrlik edən ölkə o daimi yerdə olmalıdır. Veto hüququ qalacaqsa, yeni iki üzvə də veto hüququ verilməlidir”.
Novator.az bildirir ki, 1945-ci ildə yaradılan BMT 193 ölkəni bir araya gətirir. Qurumun mərkəzi qərargahı ABŞ-ın Nyu-York şəhərində yerləşir.
Beynəlxalq sülh və təhlükəsizliyə məsul Təhlükəsizlik Şurasının 5 daimi üzvü (ABŞ, Böyük Britaniya, Çin, Fransa, Rusiya) qərarlara veto qoya bilir. Qurumun 10 üzvünü iki il müddətinə Baş Məclis seçir.
Azərbaycan 1992-ci ildən BMT üzvüdür, 2012-2013-cü illərdə Təhlükəsizlik Şurasında təmsil olunub.
Əsası 1969-cu ildə qoyulan İslam Əməkdaşlıq Təşkilatı 57 ölkəni birləşdirir. Azərbaycan quruma 1991-ci ildə qoşulub.
1961-ci ildə yaradılmış Qoşulmama Hərəkatında 120 ölkə yer alır. Azərbaycan təşkilata 2011-ci ildə qəbul olunub, 2019-cu ildən qurumda sədrlik edir.
