Minimum maaşın illəri, manatın gücü
2023-cü il yanvarın 1-dən Azərbaycanda minimum aylıq əməkhaqqının məbləği 345 manatdır. Bu, 202,9 ABŞ dolları deməkdir.
Novator.az bildirir ki, 2007-ci il fevralın 1-dən minimum əməkhaqqı 50 manat (57,4 dollar) müəyyən edilib.
2008-ci il yanvarın 1-dən məbləğ 60 manata (70,9 dollar), sentyabrın 1-dən 75 manata (92,1 dollar) qalxıb.
2010-cu il sentyabrın 1-dən 85 manat (105,7 dollar), 2011-ci il dekabrın 1-dən 93,5 manat (118,8 dollar) minimum maaş qüvvədə olub.
2013-cü il sentyabrın 1-dən minimum əməkhaqqı 105 manata (133,8 dollar) yüksəlib.
2017-ci il yanvarın 1-dən minimum maaş 116 manat (65,5 dollar), 2018-ci il yanvarın 1-dən 130 manat (76,4 dollar) məbləğində rəsmiləşib.
2019-cu il martın 1-dən 180 manat (105,8 dollar) həddi, sentyabrın 1-dən 250 manat (147 dollar) həddi, 2022-ci il yanvarın 1-dən 300 manat (176,4 dollar) həddi qüvvəyə minib.
2015-2017-ci illərdə rəsmi kursu 0,7844 manatdan 1,7001 manata yüksələn dollar 2018-ci il martın 7-dən banklara 1,7 manata təklif olunur.
Türkiyədə maliyyə üzrə ali təhsil alan tələbə Rəşid Məcidlinin rəsmi inflyasiya rəqəmləri əsasında apardığı hesablamaya görə, 100 manatın dəyəri 2015-ci illə müqayisədə 2016-cı ildə 88,1 manata, 2017-ci ildə 81,1 manata, 2018-ci ildə 79,9 manata, 2019-cu ildə 78 manata, 2020-ci ildə 76 manata, 2021-ci ildə 66,9 manata, 2022-ci ildə 57,4 manata düşüb.
Bu mənzərəyə diqqət çəkən iqtisadçı, Azərbaycan Demokratiya və Rifah Partiyasının sədri Qubad İbadoğlu yazır ki, Azərbaycanın qoşulduğu Avropa Sosial Xartiyasına görə, ölkədə minimum əməkhaqqı orta aylıq əməkhaqqının 60 faizindən yüksək olmalıdır: “2022-ci il noyabrın 1-nə muzdlu işçilərin orta aylıq nominal əməkhaqqı 827,9 manat göstərilib və minimum əməkhaqqı azı 500 manata çatdırılmalıdır”.
