Büdcə: gəlir haradan gəlir?
Bakı Araşdırmalar İnstitutu 2023-cü ilin dövlət büdcəsinin gəlir mənbələrinə nəzər salıb. Novator.az bildirir ki, hesablamaya görə, 30 milyard 773,9 milyon manat gəlirin 36,7 faizi Dövlət Neft Fondundan köçürmənin, 20,9 faizi hüquqi şəxslərin mənfəət (gəlir) vergisinin, 19,6 faizi əlavə dəyər vergisinin, 5,5 faizi fiziki şəxslərin gəlir vergisinin payına düşür.
Aksizlər üzrə 4,5 faiz, gömrük rüsumları üzrə 4,4 faiz, büdcə təşkilatlarının ödənişli xidmətləri üzrə 2,4 faiz, səhmlərində dövlətin payı olan müəssisələrdən dividendlər üzrə 1 faiz, hüquqi şəxslərin əmlak vergisi üzrə 0,9 faiz, sadələşdirilmiş vergi üzrə 0,9 faiz, digər mənbələr üzrə 3,2 faiz gəlir nəzərdə tutulur.
Həmçinin qeyd olunur ki, 2023-cü ilin büdcə gəlirləri proqnozunda neft sektorunun payı 53 faizdir. 2014-cü ildə neft sektorunun gəlirlərdə payı 66 faiz, 2015-ci ildə 58,4 faiz, 2016-cı ildə 52,7 faiz, 2017-ci ildə 47,7 faiz, 2018-ci ildə 59,5 faiz, 2019-cu ildə 56,2 faiz, 2020-ci ildə 56,7 faiz, 2021-ci ildə 51,3 faiz, 2022-ci ildə 53,2 faiz göstərilib.
