“Bakı KOB evi” açılıb
Prezident İlham Əliyev yanvarın 6-da “Bakı KOB evi”nin açılışında iştirak edib. AZƏRTAC-ın məlumatına görə, Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov dövlət başçısına deyib ki, Nərimanov rayonunda yerləşən “Bakı KOB evi” üçüncü belə qurumdur.
“Bakı KOB evi”nin üçmərtəbəli binasının ilk iki mərtəbəsi sahibkarlara xidmət göstərilməsi, üçüncü mərtəbə işçi heyət üçün nəzərdə tutulub. Evin gün ərzində beş min sahibkara xidmət göstərmək potensialı var.
Arayışa əsasən, “Bakı KOB evi”ndə sahibkarlara 29 dövlət qurumu 150-dən çox, 20 özəl qurum 100-dən çox adda xidmət göstərəcək. Sahibkarlar evə fəaliyyət üçün zəruri olan biznesin qeydiyyatı, lisenziya və icazələrin alınması, biznes planın hazırlanması, güzəştli maliyyə vəsaitlərinə çıxış, vergi, gömrük, kommunal xidmətlərə qoşulma, bank, sığorta və digər məsələlərlə bağlı müraciət edə bilərlər.
Hazırda fəaliyyətdə olan Xaçmaz və Yevlax KOB (kiçik və orta biznes) evlərində indiyədək sahibkarlara 170 mindən çox xidmət göstərildiyi vurğulanır.
