ABŞ-da seçki böhranı
ABŞ Konqresinin alt qanadı olan Nümayəndələr Palatasına sədr seçkisi dalana dirənib. Novator.az-ın məlumatına görə, yanvarın 5-də keçirilmiş 11-ci səsvermə də nəticəsiz qalıb.
2022-ci il noyabrın 8-də yenidən formalaşan 435 nəfərlik Nümayəndələr Palatasında Respublikaçılar Partiyası 222, Demokratlar Partiyası 212 mandatla təmsil olunur, 1 yer boşdur. Respublikaçılar Partiyası sədr postuna Kevin Makkartini namizəd göstərib, amma qurumun daxilində ixtilaflar üzündən Kevin Makkarti gərəkli 218 səsi qazana bilmir. Kevin Makkartiyə sabiq prezident Donald Trampa yaxın partiyadaşlarının problem yaratdığı vurğulanır. Yanvarın 5-də keçirilmiş səsvermədə sədr postuna alternativ namizəd kimi göstərilmiş Donald Trampı yalnız 1 konqresmenin dəstəklədiyi xəbər verilir.
Nümayəndələr Palatasının sədri ABŞ-ın prezident və vitse-prezidentdən sonra üçüncü ali vəzifəli şəxsi sayılır. 1923-cü ildən sonra bütün sədrlər ilk turda seçilib.
ABŞ Konqresinin yuxarı palatası – Senat 100 nəfərdən ibarətdir. Senatda respublikaçıların 49, demokratların 48, müstəqillərin 3 yeri var.
50 ştat və 1 federal dairədən ibarət ABŞ-da paytaxt Vaşinqtonun yerləşdiyi Kolumbiya dairəsinin Konqresdə təmsilçiliyi yoxdur.
Nümayəndələr Palatasında ştatların təmsilçiliyi əhalinin sayına bağlıdır. Senata hər ştatdan 2 nəfər seçilir. Vitse-prezident Senatın sədri sayılır, ancaq səsverməyə yalnız səslər tən bölünən hallarda qatıla bilir.
2021-ci il yanvarın 20-dən ölkədə prezident postunu Demokratlar Partiyasından Cozef Bayden tutur.
Mənbə: Reuters.com
