Uşaq-Gənclər İnkişaf Mərkəzi yenilənib
Prezident İlham Əliyev və birinci vitse-prezident Mehriban Əliyeva yanvarın 5-i Bakıda Uşaq-Gənclər İnkişaf Mərkəzinə baş çəkiblər.
AZƏRTAC-ın arayışına görə, Sona xanım Vəlixanlı küçəsi, 3 ünvanında yerləşən mərkəz 1937-ci ildə Mərkəzi Pionerlər Sarayı kimi yaradılıb, 1991-ci ildən Respublika Uşaq-Gənclər Yaradıcılıq Sarayı kimi fəaliyyət göstərib. 2016-cı ildə bir neçə qurumun bazasında yaradılan Uşaq-Gənclər İnkişaf Mərkəzi publik hüquqi şəxsdir.
2022-ci ildə əsaslı təmir edilən mərkəzdə rəqs, musiqi alətləri, vokal, sağlam həyat tərzi, teatr, rəssamlıq, xarici dillər, intellektual inkişaf, elm və texnologiya, ekoklub, psixologiya, kulinariya və turizm istiqamətləri üzrə 44 dərnək təşkil olunub. Həmin dərnəklərdə 1500 nəfərədək şagirdin məşğul olması nəzərdə tutulub. Binada 20 inzibati, 20 texniki və 65 pedaqoji işçi çalışacaq.
İlham Əliyev və Mehriban Əliyeva paytaxtda STEAM İnnovasiya Mərkəzinin açılışında da iştirak ediblər. Mərkəzin dördmərtəbəli yeni binasında aviasiya məkanı, klassik Nyuton, uşaqlar üçün Nyuton, konfrans, oyun, konstruksiya, “Heureka Classics” otaqları, robotların hazırlanması laboratoriyası, “3D holoqram”, VR zonaları mövcuddur.
2019-2020-ci tədris ilindən “STEAM Azərbaycan” layihəsinə start verilib. STEAM – elm, texnologiya, mühəndislik, incəsənət və riyaziyyatın birləşməsi nəticəsində yeni ideyaların reallaşdırılması, cəmiyyətdə müxtəlif problemlərin həllinə kömək edə biləcək təhsil yanaşmasıdır.
