Pensiya yeniliyi: qanun dəyişməlidir
Yanvarın 5-də sərəncam imzalayan prezident İlham Əliyev Nazirlər Kabinetinə 10 gün müddətində əmək pensiyasının minimum məbləğinin 280 manata çatdırılmasına dair təkliflərini təqdim etməyi tapşırıb.
2022-ci il yanvarın 1-dən əmək pensiyasının minimum məbləği 240 manatdır. Məbləğin 280 manata qaldırılması üçün “Əmək pensiyaları haqqında” qanuna dəyişiklik edilməlidir. Hazırda Milli Məclis qış tətilindədir.
Novator.az bildirir ki, 2023-cü ildən bütün pensiyalar orta aylıq nominal əməkhaqqının illik artım tempinə uyğun indeksləşdiriləcək. Dövlət Statistika Komitəsinin 2022-ci ilə aid son hesabatında muzdlu işçilərin orta aylıq maaşında artım 14,5 faiz göstərilib. İllik yekun rəqəm fevral ayında açıqlanacaq.
2022-ci il yanvarın 1-dək ümumi şərtlərlə pensiyaya çıxmış şəxslərə ötən il 200 manat məbləğində maddi yardım (hər rübün əvvəlində 50 manat), xüsusi şərtlərlə pensiyaya çıxmış şəxslərə əmək pensiyası məbləğinin 10 faizi məbləğində aylıq maddi yardım verilib. 2023-cü il yanvarın 1-dən hər iki yardımın bir aya düşən məbləği pensiyaların tərkibinə daxil edilib.
Azərbaycanda kişilər 65, qadınlar 63 yaşda pensiyaya çıxır. 2027-ci il iyulun 1-dək qadınların da pensiya yaşı 65-ə qalxacaq.
