Dərman idxalı: qazanan kim, itirən kim?
İqtisadçı alim, ADR Partiyasının sədri Qubad İbadoğlu dərman vasitələri idxalından yazıb. Novator.az-ın məlumatına görə, o, Dövlət Statistika Komitəsinin hesabatına əsaslanaraq qeyd edir ki, 2022-ci ilin yanvar-noyabr aylarında Azərbaycana xaricdən 424 milyon 167,9 min dollarlıq dərman vasitələri gətirilib, bu da əvvəlki ilin eyni dövrü ilə müqayisədə 29,7 faiz çoxdur: “Həmin dövrdə əczaçılıq məhsulları və tibbi ləvazimatlar üzrə pərakəndə ticarət dövriyyəsi 969,9 milyon manat olub, bu da ötən ilin eyni dövründəki göstəricini 11,1 faiz üstələyib. Azərbaycanın əczaçılıq məhsullarına tələbatının yalnız 1,2 faizinin yerli istehsal hesabına ödəndiyini nəzərə alsaq, birincisi, pərakəndə satış qiymətləri idxal qiymətlərindən 34,4 faiz yüksək olub. Bu o deməkdir ki, topdansatış şəbəkələri və apteklər 11 ay ərzində dərman satışından təxminən 250 milyon manat qazanc əldə edib.
İkincisi, əhali 2022-ci ilin 11 ayında dərmana əvvəlki ilin eyni dövrü ilə müqayisədə 110 milyon manatdan çox pul xərcləyib. Tarif Şurasının dərman monopoliyası ilə iş birliyindən idxalatçılar, depolar və apteklər qazanıb, əhali isə itirib”.
2015-ci il sentyabrın 15-dən dərman vasitələrinin təsdiqlənən qiymətlərlə satışına başlanıb. Topdan və pərakəndə satış qiymətlərini Tarif Şurası təsdiqləyir.
Tarif Şurası dövlət tənzimlənməsi tətbiq edilən qiymətlərə (tariflərə) və xidmət haqlarına məsul orqandır. Quruma iqtisadiyyat naziri sədrlik edir.
