Minimum maaşı neçəyə qaldırmaq?
İqtisadçı alim, Azərbaycan Demokratiya və Rifah Partiyasının sədri Qubad İbadoğlu minimum əməkhaqqını artırmağa çağırır.
2022-ci il yanvarın 1-dən Azərbaycanda aylıq əməkhaqqının minimum məbləği 300 manatdır.
Novator.az-ın məlumatına görə, Qubad İbadoğlu yazır ki, 2023-cü il yanvarın 1-dən minimum əməkhaqqı Ermənistanda 75000 dram (325 manat), Belarusda 554 rubl (375 manat), Rusiyada 16242 rubl (404 manat), Türkiyədə 8500 lirə (775 manat) olacaq: “Azərbaycanda minimum əməkhaqqının artırılması barədə prezident sərəncamı hələ imzalanmayıb”.
Muzdlu işçilərin aylıq orta əməkhaqqı göstəricilərinə də nəzər salan Qubad İbadoğlu qeyd edir ki, 2022-ci il noyabrın 1-nə orta maaş Azərbaycanda 487 dollar, Gürcüstanda 596,2 dollar, Ermənistanda 602,3 dollar, Qazaxıstanda 677,3 dollar olub: “Azərbaycan yaxın ölkələrdən həm minimum, həm də orta maaş sarıdan geri qalır. Hökuməti 2023-cü ilin yanvarın 1-dən minimum əməkhaqqını qaldırmağa dəvət edirəm. Avropa Sosial Xartiyasına görə, bu məbləğ Azərbaycanda ən azı orta maaşın 60 faizi qədər, yəni 500 manatdan yuxarı olmalıdır”.
