Laçın yolu müzakirəsi
Dekabrın 27-də Rusiya prezidenti Vladimir Putin Sankt-Peterburq şəhərində Ermənistanın baş naziri Nikol Paşinyanla görüşüb. Novator.az-ın məlumatına görə, Rusiya prezidenti görüşü açarkən dekabrın 26-da Ermənistan-Azərbaycan münasibətlərinin üçlükdə müzakirə olunduğunu qeyd edib. Bu sözlərdən Sankt-Peterburqda Rusiya, Azərbaycan prezidentləri və Ermənistan baş nazirinin birgə görüş keçirdiyi çıxır.
Dekabrın 26-da prezident İlham Əliyev Rusiyanın Sankt-Peterburq şəhərinə səfər edərək Müstəqil Dövlətlər Birliyinin qeyri-rəsmi sammitinə qatılıb. Sammitdə Vladimir Putinlə Nikol Paşinyan da iştirak ediblər. İlham Əliyevin səfəri həmin gün axşam başa çatıb. Onun Vladimir Putin və Nikol Paşinyanla üçtərəfli görüş keçirməsi barədə hər hansı məlumat olmayıb.
27 dekabr görüşündə Nikol Paşinyan Vladimir Putinə Laçın yolunun 20 günə yaxındır qapandığını deyib və bu barədə müzakirələrin vacib olduğunu vurğulayıb.
Azərbaycan hökumətinin və “AzerGold” şirkətinin nümayəndələri Yuxarı Qarabağda, keçmiş Ağdərə rayonu ərazisindəki Qızılbulaq qızıl və Dəmirli mis-molibden yataqlarında monitorinq aparmaq istəyir. Rusiya hərbi qüvvələrinin Xocalıdakı qərargahında komandanlıqla dekabrın 3-də və 7-də keçirilmiş görüşlərdə yataqlara yerində baxış, qanunsuz istismarın dayandırılması, müxtəlif istiqamətlər üzrə monitorinq və inventarizasiyanın aparılması, əmlakın kadastr uçotunun təşkili, ətraf mühitə, yeraltı və yerüstü su mənbələrinə potensial zərərin və risklərin qiymətləndirilməsi və dəymiş zərərin nəticələrinin aradan qaldırılması məsələləri müzakirə olunub.
Dekabrın 10-da ermənilər Azərbaycan nümayəndələrinin Qızılbulaq və Dəmirli yataqlarına baş çəkməsini əngəlləyib.
Dekabrın 12-si səhərdən azərbaycanlı fəallar Yuxarı Qarabağdan Ermənistana gedən Laçın yolunun Şuşa şəhəri yaxınlığında oturaq aksiya keçirərək Azərbaycan nümayəndələrinin Qızılbulaq qızıl yatağına və Dəmirli mis-molibden yatağına baş çəkməsinə şərait yaratmaq tələbi qoyub.
Azərbaycan nümayəndələri dekabrın 16-sı Xocalıda Rusiya hərbi qüvvələrinin komandanlığı ilə daha bir görüş keçirib, ancaq Qızılbulaq və Dəmirli yataqlarında monitorinqə yenə şərait yaradılmayıb.
1988-ci ildə ermənilər Azərbaycanın Dağlıq (Yuxarı) Qarabağ vilayətinin Ermənistana verilməsi tələbi ilə separatçı hərəkata başlayıb, bu, getdikcə vüsət alaraq Ermənistanın açıq təcavüzünə çevrilib.
1991-ci ildə ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-cü ildə elan olunan atəşkəsə qədər Ermənistan Azərbaycanın bütün cənub-qərbini ələ keçirib.
2020-ci il sentyabrın 27-dən noyabrın 10-dək Azərbaycanın apardığı hərbi əməliyyatlarda və savaşdan sonrakı danışıqlarla Cəbrayıl, Füzuli, Zəngilan, Qubadlı, Ağdam, Kəlbəcər, Laçın rayonları tam, Şuşa, Xocavənd, Xocalı rayonları və keçmiş Ağdərə rayonu qismən azad olunub.
Yuxarı Qarabağa və bölgədən Ermənistana gedən Laçın yoluna Rusiyanın hərbi kontingenti nəzarət edir. Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi özünü “Dağlıq Qarabağ Respublikası” və ya “Arsax Respublikası” adlandıran işğalçı rejimin idarəçiliyindədir.
