Dövlət Təhlükəsizliyi Xidmətinin həbs bilgisi
Dekabrın 26-da Dövlət Təhlükəsizliyi Xidməti vətəndaş Taleh Yusifovun həbsi ilə bağlı məlumat yayıb. Qeyd olunur ki, 1967-ci il təvəllüdlü Yusifov Taleh Rəşid oğlunun Azərbaycan vətəndaşlarının İranda yaradılan “Hüseyniyun” adlı qanunsuz silahlı birləşməyə cəlb edilməsini üçüncü ölkə ərazisindən təşkilini həyata keçirməsi, bu istiqamətdə görülən işlərin gizliliyini və maliyyələşdirilməsini təmin etməsi, “Təqi” ləqəbi altında qanunsuz silahlı birləşmənin fəaliyyətində iştirakına əsaslı şübhələr üzə çıxıb: “Həmçinin müəyyənləşdirilib ki, Taleh Yusifov 2016-cı ilin əvvəllərində İran ərazisinə keçib Səfərov Yunis Rafiq oğlu (məhkum edilib), Əsədov Rövşən Elçin oğlu və digərləri ilə birlikdə gizli yaratdıqları qanunsuz silahlı birləşmənin tərkibində müxtəlif silahlarla hərbi təlimlərə qatılıb, həmin şəxslərlə birgə Suriya ərazisində hərbi xarakterli əməliyyat tədbirlərinin planlaşdırılması, kəşfiyyat işlərinin aparılması ilə bağlı xüsusi təlimlər keçib.
Taleh Yusifov Azərbaycan Respublikasından kənarda qanunvericilikdə nəzərdə tutulmayan silahlı birləşmələrin yaradılmasında və fəaliyyətində iştirak etmə ittihamı ilə təqsirləndirilən şəxs qismində məsuliyyətə cəlb olunub, barəsində məhkəmənin qərarı ilə həbs qətimkan tədbiri seçilərək beynəlxalq axtarış elan edilib. Taleh Yusifovun xarici ölkədə gizləndiyi yer müəyyən olunub və o, beynəlxalq axtarışa dair qarşılıqlı hüquqi yardım çərçivəsində tutularaq Azərbaycana ekstradisiya edilib”.
Dövlət Təhlükəsizliyi Xidməti noyabrın 1-də İran xüsusi xidmət orqanlarının Azərbaycanda yaratdığı qanunsuz silahlı birləşmənin, noyabrın 14-də casus şəbəkəsinin ifşa edildiyini açıqlayıb.
