Cibimizdən çıxan idxal
Dövlət Gömrük Komitəsi 2022-ci ilin yanvar-noyabr aylarında Azərbaycanın 184 ölkə ilə ticarət əməliyyatı apardığını, ixracın 36,3 milyard dolları, idxalın 12,8 milyard dolları ötdüyünü, dövlət büdcəsinə 5 milyard 89,6 milyon manata yaxın vəsait ödəndiyini açıqlayıb. Novator.az-ın məlumatına görə, rəsmi statistikanı şərh edən iqtisadçı Rövşən Ağayev yazır ki, gömrükdən büdcəyə daxilolma 2021-ci ilin yanvar-noyabr aylarına nəzərən 1,2 milyard manata yaxın, 29 faiz artıb. Səbəb idxalda kəskin yüksəlişdir. İdxalda 2,5 milyard dollar, 24 faiz artım qeydə alınıb. Demək olar ki, bütün gömrük vergi-rüsumları idxaldan toplanır.
Bəs idxalın bu cür kəskin artımının səbəbi nədir? Qiymət artımı. İdxal real ifadədə 2 faizdən bir az çox artıb. 24 faizlik artımın 22 faizə qədəri məhz idxaldakı kəskin bahalanma hesabınadır. Tək idxal mallarının qiymət artımına görə 11 ayda cibimizdən 1,2 milyard manat əlavə pul çıxıb büdcəyə gedib”.
