Vasif Talıbov istefa verdi
Dekabrın 21-də Naxçıvan Muxtar Respublikası Ali Məclisinin sədri Vasif Talıbov istefa verib. Xəbəri APA yayıb.
Novator.az bildirir ki, 1960-cı il təvəllüdlü Vasif Talıbov Naxçıvan Dövlət Pedaqoji İnstitutunun (indiki Naxçıvan Dövlət Universiteti) tarix-filologiya fakültəsini və Bakı Dövlət Universitetinin hüquq fakültəsini bitirib.
1991-ci ildən Naxçıvan Muxtar Respublikası Ali Məclisi sədrinin baş köməkçisi, 1994-cü ildən Naxçıvan Muxtar Respublikası baş nazirinin xarici-iqtisadi əlaqələr üzrə birinci müavini vəzifələrində çalışıb.
1995-ci ildən Naxçıvan Muxtar Respublikası Ali Məclisinin sədri idi.
Milli Məclisin deputatı, hakim Yeni Azərbaycan Partiyası İdarə Heyətinin üzvüdür.
Naxçıvan Muxtar Respublikası Azərbaycanın tərkibində muxtar dövlətdir. Bölgədə qanunvericilik hakimiyyətini Ali Məclis, icra hakimiyyətini yerli Nazirlər Kabineti həyata keçirir.
Ali Məclisin sədri Naxçıvan Muxtar Respublikasının ali vəzifəli şəxsi sayılır, həm qanunvericilik, həm icra hakimiyyəti sahələrində bir çox səlahiyyəti həyata keçirir.
Dairələr üzrə seçilən 45 üzvdən ibarət Ali Məclisin səlahiyyət müddəti 5 ildir. Sədr və müavinlərini Ali Məclis seçir.
Naxçıvan Muxtar Respublikasının Konstitusiyasına görə, bölgədə azı beş il daimi yaşayan, başqa dövlətlər qarşısında öhdəliyi və ikili vətəndaşlığı olmayan, ali təhsilli Ali Məclis üzvü sədr seçilə bilər.
