Əli Kərimli: “Azad məhkəmə budur”
AXCP sədri Əli Kərimli Qubadlı Rayon İcra Hakimiyyətinin sabiq başçısı Elxan Nuriyevin azadlığa buraxılmasından yazıb.
Milli azadlıq hərəkatının fəalı, Birinci Qarabağ müharibəsinin iştirakçısı olmuş Elxan Nuriyev Qubadlı Rayon İcra Hakimiyyətinə Əbülfəz Elçibəyin prezidentliyi dövründə (1992-1993) başçılıq edib. 1993-cü ildə Elxan Nuriyev Ukraynaya mühacirət edib və vətəndaşlıq alıb, ölkənin ictimai-siyasi həyatında yaxından iştirak edib.
Elxan Nuriyev 2022-ci il oktyabrın 2-si Polşada tutulub. Onun Azərbaycanda qəsdən adam öldürmə və vəzifə səlahiyyətlərini aşma ittihamları ilə beynəlxalq axtarışda olduğu açıqlanıb.
Azərbaycanın bəzi müxalif qüvvələri Elxan Nuriyevin siyasi motivli qərar əsasında saxlandığını iddia edib.
Dekabrın 20-də Elxan Nuriyevin azadlığa buraxıldığı xəbəri yayılıb.
Novator.az-ın məlumatına görə, Əli Kərimli yazır ki, Elxan Nuriyevi şəxsən tanıdığı üçün onun cinayətkar, qatil olmadığına əmindir: “İnanırdım ki, rejim Elçibəy hakimiyyətinin digər nümayəndələri kimi Elxan bəyi də şərləyir. Ona görə də özümə borc bilib Polşaya, məhkəməyə rəsmi müraciət göndərmişdim. Bildirmişdim ki, məhkəmə repressiv Azərbaycan hakimiyyətinin iddialarını ciddi araşdıracağı halda Elxan bəyin cinayətkar deyil, rejimin şərlədiyi qurban olduğu qənaətinə gələcək. Şadam ki, məhkəmə uzun araşdırmalardan sonra Elxan bəy haqda ədalətli qərar çıxardı. Azad məhkəmə, qanunun aliliyi budur. İnanıram ki, biz də bir gün ölkəmizdə azad məhkəmələr qura, qanunun aliliyini təmin edə biləcəyik”.
Sabiq icra başçısı niyə tutulub?
