Messinin titulları
Novator.az futbol ulduzu Lionel Messinin əsas titullarını təqdim edir.
1987-ci il iyunun 24-ü Argentinanın Rosario şəhərində doğulan Messi ilk futbol dərslərini ölkəsinin “Qrandoli” və “Nyuells Old Boyz” komandalarında alıb, 2000-ci ildən İspaniyada yaşayıb, “Barselona” klubunun məktəbində yetişib.
2004-2021-ci illərdə “Barselona” forması geyinmiş Messi 2021-ci ildən Fransanın PSJ komandasında oynayır.
Messi 10 dəfə İspaniya çempionu, 1 dəfə Fransa çempionu olub, 7 dəfə İspaniya kubokunu, 7 dəfə İspaniya superkubokunu, 1 dəfə Fransa superkubokunu qazanıb.
“Barselona” ilə Messi 4 dəfə UEFA Çempionlar Liqasının qalibi olub, 3 dəfə UEFA superkubokunu qazanıb, 3 dəfə klublar arasında dünya çempionluğu əldə edib.
Messi Argentinanın gənclər yığması ilə dünya çempionu (2005) və olimpiya çempionu (2008) titullarına sahib çıxıb.
2005-ci ildən oynadığı Argentina milli komandasının heyətində Messi Amerika kubokunun sahibi (2021), dünya çempionu (2022) olub.
Messi futbolda ən nüfuzlu fərdi təltif sayılan “Qızıl top” mükafatının rekordçusudur. O, 2009, 2010, 2011, 2012, 2015, 2019, 2021-ci illərdə dünyanın ən yaxşı futbolçusu seçilərək “Qızıl top” alıb.
