Format axtarışında
FİFA 2026-cı ildə ABŞ, Kanada və Meksikanın ev sahibliyi edəcəyi dünya futbol çempionatının formatını müzakirə edir. 48 millinin buraxılacağı çempionatda yığmaları ya 3 komandalıq 16 qrupa, ya da 4 komandalıq 12 qrupa bölmək planı var.
Avropaya 16, Afrikaya 9, Asiyaya 8, Cənubi Amerikaya 6, Şimali və Mərkəzi Amerikaya 6, Okeaniyaya 1 yer ayrılıb.
Qalan 2 vəsiqənin sahibi Afrika, Asiya, Okeaniya, Cənubi Amerika, Şimali və Mərkəzi Amerika təmsilçiləri arasında əlavə oyunlarda müəyyənləşəcək.
Novator.az bildirir ki, 1930 və 1950-ci illərin çempionatlarında 13 milli komanda, 1938-ci ilin çempionatında 15 yığma yer alıb.
1934-cü ilin çempionatına 16 komanda qatılıb, 1954-cü ildən eyni say tətbiq edilib.
1982-ci ildən dünya çempionatları 24 yığmanın, 1998-ci ildən 32 millinin iştirakı ilə baş tutub.
1930 və 1950-ci illərdə Uruqvay, 1934, 1938, 1982 və 2006-cı illərdə İtaliya, 1954, 1974, 1990 və 2014-cü illərdə Almaniya (Qərbi Almaniya), 1958, 1962, 1970, 1994 və 2002-ci illərdə Braziliya, 1966-cı ildə İngiltərə, 1978, 1986 və 2022-ci illərdə Argentina, 1998 və 2018-ci illərdə Fransa, 2010-cu ildə İspaniya dünya çempionu olub.
