Bəxtiyar Hacıyev aclığı davam etdirir
Vəkil Aqil Layic dekabrın 16-da Bakı İstintaq Təcridxanasında müxalif fəal Bəxtiyar Hacıyevə baş çəkib. Novator.az-ın məlumatına vəkil yazır ki, Bəxtiyar Hacıyev aclığı davam etdirir, yalnız su içir: “Aksiyanı dayandırmasını istədim, ictimaiyyətin bu barədə çağırışlarını çatdırdım. Amma qərarından daşınmadı, dedi ki, haqsızlığa məruz qaldığı üçün bu addımı atmağa məcburdur”.
Xətai Rayon Məhkəməsi dekabrın 9-da Bəxtiyar Hacıyev barəsində 1 ay 20 günlük həbs qətimkan tədbiri seçib. Bakı Şəhər Baş Polis İdarəsi ona xuliqanlıq və məhkəməyə hörmətsizlik ittihamları irəli sürüb. İddiaya görə, jurnalist Ülviyyə Alovlu ilə mülki münaqişədə olan Bəxtiyar Hacıyev bu iş üzrə məhkəmə proseslərinin birində dava salıb. Bəxtiyar Hacıyev ittihamları rədd edir, hakimiyyəti mütəmadi tənqid etdiyi üçün siyasi təzyiqə məruz qaldığını deyir.
Dekabrın 15-də Bakı Apellyasiya Məhkəməsi həbs qərarını qüvvədə saxlayıb. Fəal məhkəmə prosesində deyib ki, dekabrın 15-i səhərdən azadlığa buraxılmaq tələbi ilə aclıq aksiyasına başlayıb.
1982-ci il təvəllüdlü Bəxtiyar Hacıyev Bakı Dövlət Universitetinin və ABŞ-ın Harvard Universitetinin məzunudur. 2011-2012-ci illərdə hərbi çağırışdan yayınmaq ittihamı ilə həbsdə yatıb.
Bəxtiyar Hacıyevə hansı ittihamlar verilib?
