Avropa Məhkəməsindən yeni cərimələr
Avropa İnsan Hüquqları Məhkəməsi dekabrın 15-də Azərbaycandan şikayətlər üzrə yeni qərarlar elan edib. Aihmaz.org xəbər verir ki, məhkəmə narkotik ittihamı ilə tutulub həbsdə yatmış Cabbar Savalanlı, Fərəc Kərimov, Sirac Kərimli və Murad Ədilovin Avropa İnsan Hüquqları Konvensiyası ilə qorunan azadlıq və toxunulmazlıq hüquqlarının pozulduğu qənaətinə gəlib. Qərara əsasən, Azərbaycan dövləti onların hər birinə 10 min avro təzminat ödəməlidir. Fərəc Kərimov və Sirac Kərimli üçün ümumilikdə 3 min avro, Murad Ədilov üçün 2 min avro xərc və məsrəf əvəzi ödəniş də nəzərdə tutulur.
Cavid Məmmədov şikayətində azadlıq və toxunulmazlıq hüququnun pozuntusuna məruz qaldığını iddia edib, bildirib ki, yerli məhkəmələr onun həbsinə qanuni əsaslar göstərməyib. Bu işdə tərəflər anlaşıblar, Azərbaycan dövləti ərizəçiyə 3500 avro təzminat ödəməyə boyun olub.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
