Saakaşvilinin oğlu müraciət yayıb
Gürcüstanın sabiq prezidenti, məhbus Mixail Saakaşvilinin oğlu Eduard Saakaşvili dekabrın 13-də müraciət yayaraq atasının xaricdə müalicəsinə şərait yaradılmasını istəyib. Novator.az-ın məlumatına görə, Eduard Saakaşvili qeyd edir ki, hər ziyarətində enerjisi, ambisiyası, xarizması ilə tanınan atasının sürətlə geri getdiyini, səhhətinin daha da ağırlaşdığını görür: “Ailə üzvləri bu çətin vəziyyətdən çıxış yolu axtarır. Çıxış yolu isə sadədir: atama xaricdə, uyğun klinikada müalicə imkanı vermək”.
Mixail Saakaşvilinin həyat yoldaşı niderlandlı Sandra Rulofsdur. Onların iki oğlu var: Eduard 1995-ci ildə, Nikoloz 2005-ci ildə doğulub.
1967-ci il təvəllüdlü Mixail Saakaşvili Ukrayna, Fransa və ABŞ-da ali təhsil alıb.
İki dəfə parlamentin deputatı seçilib, ədliyyə naziri, Tbilisi meri olub.
2003-cü ildə dinc inqilaba başçılıq edən Mixail Saakaşvili 2004-2013-cü illərdə prezident postunu tutub.
2013-cü ildə ölkəsini tərk edib, 2015-ci ildən Ukraynada yaşayaraq vətəndaşlıq alıb, həmin il Gürcüstan vətəndaşlığından məhrum edilib.
Mixail Saakaşvili Gürcüstanda müxtəlif cinayət işləri üzrə qiyabi məsuliyyətə cəlb olunub. 2018-ci il yanvarın 5-də Tbilisi Şəhər Məhkəməsi ona 3 il, iyunun 28-də 6 il müddətinə azadlıqdan məhrumetmə cəzaları kəsib.
2021-ci ilədək Tbilisi Şəhər Məhkəməsinin icraatında daha iki cinayət işi olub.
2021-ci il sentyabrın 29-da gizli yolla Gürcüstana dönən sabiq prezident oktyabrın 1-i paytaxt Tbilisidə tutulub, Rustavi şəhərindəki həbsxanaya yerləşdirilib.
Oktyabrın 20-də Gürcüstan Prokurorluğu Mixail Saakaşviliyə dövlət sərhədini qanunsuz keçmək ittihamı irəli sürüb. Bu iş də Tbilisi Şəhər Məhkəməsinin icraatına verilib.
Tutulandan sonra sabiq prezident iki dəfə aclıq aksiyası keçirib (1 oktyabr-20 noyabr 2021-ci ildə və 21 fevral-10 mart 2022-ci ildə).
Hazırda ana müxalifət sayılan Vahid Milli Hərəkat Partiyasının qurucusu olan Mixail Saakaşvili 2022-ci il mayın 12-də Tbilisidəki “Vivamedi” Tibb Mərkəzinə köçürülüb. Yaxınları, tərəfdarları və vəkilləri onun azadlığa buraxılmasını, xaricdə müalicə olunmasına şərait yaradılmasını tələb edirlər.
Gürcüstan ombudsmanı nəzdində həkimlər şurasının üzvləri dekabrın 4-də Mixail Saakaşviliyə baş çəkib. Onların rəyinə görə, sabiq prezident həbs müddətində 42,4 kiloqram arıqlayıb.
