Müdafiə Nazirliyi rəhbərliyində yenilik
Mülki şəxs Aqil Səlim oğlu Qurbanov müdafiə nazirinin hərbi-texniki təchizat üzrə müavini təyin olunub. Müdafiə Nazirliyinin 13 dekabr məlumatına görə, prezident İlham Əliyev təyinat sərəncamını dekabrın 9-da imzalayıb.
Aqil Qurbanov 15 avqust 1986-cı ildə Bakıda doğulub. Dövlət İdarəçilik Akademiyasında bakalavr, London İqtisadiyyat və Siyasi Elmlər Məktəbində magistr təhsili alıb. “PAŞA Holdinq” MMC-də investisiyalar üzrə direktor, Sumqayıt Texnologiyalar Parkında Müşahidə Şurasının sədri vəzifələrində çalışıb.
Novator.az bildirir ki, müdafiə nazirinin birinci müavini, Azərbaycan Ordusunun Baş Qərargah rəisi postunu general-polkovnik Kərim Vəliyev tutur.
General-leytenant Nizam Osmanov nazir müavini, Maddi-Texniki Təminat Baş İdarəsinin rəisi, general-leytenant Ənvər Əfəndiyev nazir müavini, Quru Qoşunlarının komandanı, general-polkovnik Kərəm Mustafayev nazir müavini, Əlahiddə Ümumqoşun Ordusunun (Naxçıvan Muxtar Respublikası) komandanı, general-leytenant Ramiz Tahirov nazir müavini, Hərbi Hava Qüvvələrinin komandanıdır.
Müdafiə nazirinin müavini, Şəxsi Heyət Baş İdarəsinin rəisi postu boşdur.
22 oktyabr 2013-cü ildən müdafiə naziri vəzifəsini Zakir Həsənov tutur. General-polkovnikdir.
