Aclıq dayandı
Bakıdakı 12 saylı Cəzaçəkmə Müəssisəsində saxlanan ilahiyyatçı, Müsəlman Birliyi Hərəkatının sədri Taleh Bağırov aclıq aksiyasını dayandırıb. Xəbəri dekabrın 11-də “Turan” yayıb. Qeyd olunur ki, məhbus qərarını səhhətində problemlər yaranması və cəzaçəkmə müəssisəsində təzyiqlərin dayandırılması ilə əsaslandırıb.
Taleh Bağırov 12 saylı Cəzaçəkmə Müəssisəsinə noyabrın 26-da Qobustan həbsxanasından köçürülüb. Məlumata görə, məhbus həmin gün rəis müavininin təhqiri ilə üzləşdiyi üçün aclıq aksiyasına başlamış, başqa cəzaçəkmə müəssisəsinə köçürülmək tələbi qoymuşdu.
1984-cü il təvəllüdlü Taleh Bağırov Azərbaycan Dövlət İqtisad Universitetini bitirib, İranda və İraqda dini təhsil alıb.
2011-2012 və 2013-2015-ci illərdə həbsdə olub.
Müxalif baxışları ilə tanınan ilahiyyatçı 2015-ci ildə yenidən tutulub, 2017-ci ildə dövlətin konstitusiya quruluşunu zorla dəyişdirmək, şəriət qanunları ilə idarə edilən dini dövlət qurmaq məqsədilə silahlanaraq hakimiyyət nümayəndələrinə qarşı terror aktları törətməyi planlaşdırmaqda təqsirli bilinərək 20 il müddətinə azadlıqdan məhrum edilib, 2018-ci ildə həbs yerində qadağan olunmuş əşya (yaddaş kartları) saxlamaqda təqsirli bilinərək daha beş ay müddətinə azadlıqdan məhrumetmə cəzası alıb.
