Xorvatiyaya iki yaşıl işıq
Avropa İttifaqının üzvü olan Xorvatiya 2023-cü il yanvarın 1-dən həm Şengen zonasına alınır, həm də avro məkanına daxil olur.
Əsası 1957-ci ildə qoyulan Avropa İttifaqı 27 ölkəni birləşdirir. Xorvatiya 2013-cü ildən Avropa İttifaqının üzvüdür.
Novator.az bildirir ki, dövlət sərhədlərindən asan keçid sistemi olan Şengen zonasına hazırda Avropa İttifaqının 22 ölkəsi (Almaniya, Avstriya, Belçika, Çexiya, Danimarka, Estoniya, Finlandiya, Fransa, İspaniya, İsveç, İtaliya, Latviya, Litva, Lüksemburq, Macarıstan, Malta, Niderland, Polşa, Portuqaliya, Slovakiya, Sloveniya, Yunanıstan), həmçinin İslandiya, İsveçrə, Lixtenşteyn, Norveç daxildir.
Şengen zonasının əsasını 1985-ci il iyunun 14-ü Almaniya, Belçika, Fransa, Lüksemburq və Niderland qoyub. Sərhəd rejiminin yumşaldılmasını nəzərdə tutan saziş Lüksemburqun Şengen kəndi yaxınlığında imzalanıb.
Avro nağdsız dövriyyəyə 1999-cu il yanvarın 1-də buraxılıb, 2002-ci il yanvarın 1-dən real pul vahidi kimi işlədilir, Avropa İttifaqının 19 ölkəsində milli valyuta sayılır: Almaniya, Avstriya, Belçika, Estoniya, Finlandiya, Fransa, İrlandiya, İspaniya, İtaliya, Kipr, Latviya, Litva, Lüksemburq, Malta, Niderland, Portuqaliya, Slovakiya, Sloveniya, Yunanıstan.
Avropa İttifaqı üzvü olmayan daha 6 ölkə avro zonasına daxildir: Andorra, Kosovo, Monako, Monteneqro, San Marino, Vatikan.
