Prokurorluq: qanunlar necə yeniləndi?
Prezident İlham Əliyev prokurorluq sistemi qanunlarında yenilikləri imzalayıb. Novator.az bildirir ki, “Prokurorluq haqqında” qanunun 38-ci maddəsinin ikinci hissəsi ləğv olunub. Həmin müddəa hərbi prokurorluq orqanlarının hərbi qulluqçularına hərbi qulluqçular üçün müəyyən edilmiş pensiya, tibbi və başqa növ maddi və sosial təminatların da şamil edilməsini nəzərdə tuturdu.
“Prokurorluq orqanlarında qulluq keçmə haqqında” qanundan 20.8-ci maddə çıxarılıb. Həmin maddəyə görə, prokurorluq işçilərinə məzuniyyətə çıxarkən iki aylıq əməkhaqqı məbləğində pul təminatı verilirdi.
Başqa yeniliyə əsasən, prokurorluq işçilərinin (pensiyaya çıxmış işçilər də daxil olmaqla), o cümlədən onların ailə üzvlərinin tibbi təminatı “Tibbi sığorta haqqında” qanuna uyğun həyata keçirilir; hərbi prokurorluq orqanlarının prokurorluq işçisi olan hərbi qulluqçularına hərbi qulluqçular üçün müəyyən edilmiş daha əlverişli şərtlərlə pensiya, tibbi və başqa növ maddi və sosial təminatlar şamil edilir.
Başqa bir dəyişikliklə prokurorluq işçiləri hər ay vəzifə maaşlarının 1,25 misli məbləğində vəzifə maaşına əlavə alacaq.
Həmçinin prokurorluq işçilərinə pul mükafatının verilməsi məqsədilə hər il dövlət büdcəsində prokurorluq işçiləri üçün müəyyən olunmuş aylıq vəzifə maaşının 3 misli həcmində əlavə vəsait nəzərdə tutulacaq.
Yeniliklər 2022-ci il sentyabrın 1-dən qüvvəyə minir.
