Azərbaycan qərarları elan olunacaq
Avropa İnsan Hüquqları Məhkəməsi dekabrın 15-də Azərbaycandan şikayətlər üzrə yeni qərarlar elan edəcək. Aihmaz.org xəbər verir ki, Cabbar Savalanlı, Fərəc Kərimov, Sirac Kərimli və Murad Ədilov narkotik ittihamı ilə tutulmalarından şikayət veriblər. Onlar Avropa İnsan Hüquqları Konvensiyasının azadlıq və toxunulmazlıq hüququ, həmçinin hüquqlarla bağlı məhdudiyyətlərdən istifadənin hədləri barədə tələblərinə əsaslanaraq hökumət əleyhinə fəaliyyətlərinə görə qanunsuz həbs edildiklərini bildirirlər.
Cavid Məmmədov da azadlıq və toxunulmazlıq hüququnun pozuntusuna məruz qaldığını iddia edir, bildirir ki, yerli məhkəmələr onun həbsinə qanuni əsaslar göstərməyib.
Fransanın Strasburq şəhərində yerləşən, hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub, 2002-ci ildən Avropa Məhkəməsinin təsir dairəsindədir.
