“Sadəlövhcəsinə ümid edirlər ki…”
Milli Məclis “Siyasi partiyalar haqqında” yeni qanun layihəsini iki oxunuşda qəbul edib. Layihəyə görə, partiyanın dövlət qeydiyyatına alınmadan fəaliyyət göstərməsinə yol verilmir. Siyasi partiyanı Azərbaycanın tam fəaliyyət qabiliyyətli olan azı 50 vətəndaşı təsis edə bilər. Dövlət qeydiyyatına alınması üçün partiyanın azı 5000 üzvü olması tələbi qoyulur. Qanun qüvvəyə minənədək dövlət qeydiyyatına alınmış siyasi partiyalar 180 gün müddətində üzvlərinin sayını 5000 min nəfərə çatdırmalı, üzvlərinin reyestrini hazırlayıb icra hakimiyyəti orqanına (qeydiyyat məsələsinə Ədliyyə Nazirliyi məsuldur) təqdim etməlidir.
Dövlət qeydiyyatına alınmış siyasi partiyada üzv sayı 4500-dən aşağı düşdükdə qurum məhkəmə qərarı əsasında ləğv edilə bilər.
1992-ci il iyunun 3-də qəbul edilmiş indiki qanunla siyasi partiyanın qeydiyyatı üçün 1000 üzv kifayətdir. Hazırda ölkədə 60 partiya dövlət qeydiyyatındadır.
Milli Məclis “Siyasi partiyalar haqqında” qanun layihəsinin ilkin variantını sentyabrın 7-də təqdim edib, noyabrın 21-də yenilənmiş variantını açıqlayıb. Yeni variant parlamentdə ilk oxunuşdan noyabrın 29-da, ikinci oxunuşdan dekabrın 6-da keçib.
Novator.az-ın məlumatına görə, AXCP sədri Əli Kərimli yazır ki, hakimiyyət Azərbaycan cəmiyyətinin etirazlarını, beynəlxalq çağırışları qulaqardına vurub real müxalifəti sıradan çıxarmağa hədəflənən “Siyasi partiyalar haqqında” qanunu sürətlə qəbul etmək istəyir: “Sadəlövhcəsinə ümid edirlər ki, AXCP-nin qeydiyyatını ləğv etmək və yeni real müxalifət partiyalarının yaranmasına imkan verməmək rejimi xilas edəcək. Başa düşmürlər ki, 30 il davam etmiş repressiya avtoritar idarəetmənin daimiliyinə təminat yaratmayıbsa, rejimin payızında atılan məhdudlaşdırıcı addımlar da bu təminatı yaratmayacaq.
AXCP-nin simasında real müxalifəti hüquq müstəvisindən çıxarmaq onunla nəticələnəcək ki, minlərlə cəbhəçi bütün ölkə boyu daha aktiv mübarizəyə keçəcək, mübariz insanlar kütləvi şəkildə AXCP-ni seçəcək. Rejimin real müxalifəti sıxışdırıb hüquq müstəvisindən çıxarması bütövlükdə xalqımızın müxalifətə keçməsi prosesini başa çatdıracaq, bu isə rejimin sonunu sürətləndirəcək”.
AXCP 1995-ci ildə, 1989-cu ildə yaradılmış Azərbaycan Xalq Cəbhəsinin bazasında qurulub, həmin il dövlət qeydiyyatına alınıb. Əli Kərimli AXCP-yə 2000-ci ildən rəhbərlik edir, sədr postuna 2001-ci ildə seçilib.
Partiyaların yeni qanunu: layihə dərc edildi
“Siyasi partiyalar haqqında” qanun (Layihə)
“Ölkədə elə bir müxalifət var ki…”
Partiyaya ianə: köhnə norma, indiki, plan
Yaxın ölkələrdə partiya qurmaq şərtləri
Yeni qanun nə təhlükə doğurur?
Partiya qanunu: layihə yenilənib
“Siyasi partiyalar haqqında” qanun (Layihə)
Partiyanın dövlət pulu: vəsait necə bölünəcək?
Partiyanın ləğvi: qanun layihəsi nə deyir?
60 partiyaya 180 gün vaxt veriləcək
Partiya qanunu ilk oxunuşdan keçdi
