Artımlar təklifi
Büdcə zərfi layihələrində 2023-cü il üçün yaşayış minimumu və ünvanlı dövlət sosial yardımının təyin edilməsi məqsədilə ehtiyac meyarının həddi 246 manat götürülür.
Yaşayış minimumu rəsmi minimum istehlak səbətinə əsaslanır. Səbətə ərzaq məhsulları, qeyri-ərzaq malları, xidmətlər daxildir. Ünvanlı dövlət sosial yardımı orta aylıq gəliri onlardan asılı olmayan bəzi səbəblərdən hər bir ailə üzvü üçün ehtiyac meyarının məcmusundan aşağı olan aztəminatlı ailələrə verilir.
Novator.az-ın məlumatına görə, Azərbaycan Demokratiya və Rifah Partiyasının sədri, iqtisadçı alim Qubad İbadoğlu yazır ki, yaşayış minimumu və ehtiyac meyarının həddi 246 manat müəyyən edilsə, 246 manatdan aşağı ödəniş də olmamalıdır, ondan aşağı məbləğlə bir ayın xərcləri qarşılanmaz: “Amma Azərbaycanda minimum pensiya məbləği 240 manat, yaşa görə müavinət 180 manat, müharibə veteranının təqaüdü 80 manatdır. 40 ölçülü ayağa 38, 37, 32 ölçülü ayaqqabı geymək olarmı? Sosial ədalətsizliyi və iqtisadi uyğunsuzluğu aradan qaldırmaq üçün müharibə veteranlarının təqaüdü 160 manata, yaşa görə müavinət 250 manata, minimum pensiya məbləği 300 manata çatdırılmalıdır”.
