“Tərtər işi”: 19 nəfər azadlığa buraxılıb
“Tərtər işi” üzrə yeni rəsmi bilgi yayılıb.
2017-ci il mayın 8-də Baş Prokurorluq, Müdafiə Nazirliyi, Daxili İşlər Nazirliyi və Dövlət Təhlükəsizliyi Xidməti birgə bəyanat yayaraq bildirmişdi ki, Tərtər rayonu istiqamətində bir qrup hərbi qulluqçu və mülki şəxs hərbi sirr təşkil edən məlumatları xarici düşmənə ötürüb, toplanmış materiallar əsasında 3 may 2017-ci ildə Hərbi Prokurorluqda cinayət işi başlanıb, bir qrup hərbi qulluqçu və mülki şəxs həbs edilib.
Müdafiə Nazirliyinin Tərtər, Ağdam, Beyləqan rayonları istiqamətində yerləşən hərbi hissələrində xidmət edən yüzlərlə hərbi qulluqçu “Tərtər işi” adı ilə tanınan bu iş üzrə ermənilərlə məxfi əməkdaşlıqda şübhəli bilinməklə fiziki təsirlərə və qanunsuz sorğuya məruz qalıb, bir çox şəxs xəsarətlər nəticəsində həlak olub.
2021-ci il dekabrın 16-dan Baş Prokurorluq həmin cinayət işlərini yenidən araşdırır.
Baş Prokurorluğun 2022-ci il dekabrın 6-da yaydığı məlumata görə, əvvəllər istintaqı aparılmaqla məhkəməyə göndərilmiş 3 cinayət işi üzrə təqsirli bilinərək məhkum olunmuş ümumilikdə 19 şəxs barəsində məhkəmə qərarlarına Ali Məhkəmənin Plenumunda yenidən baxılıb, həmin qərarlar ləğv edilərək müvafiq məhkəmələrə, həmin məhkəmələrdən isə ibtidai araşdırmaya prosessual rəhbərliyi həyata keçirən prokurora qaytarılıb: “Əlavə istintaq zamanı həmin şəxslərin dövlətə xəyanət ittihamı üzrə təqsiri sübuta yetirilmədiyindən cinayət təqibinə bəraətverici əsaslarla (10 şəxs barəsində digər epizodlar üzrə olan cinayət təqibinə bəraətverici olmayan əsaslarla) xitam verilib, onlar azadlığa buraxılıb. Eyni zamanda mərhum Hüseynov Mehman Telman oğlu və Ağazadə Elxan Kəmaləddin oğlunun cinayət təqibinə bəraətverici əsaslarla xitam verilməsi haqqında qərarlar qəbul edilib”.
İşgəncə və qətllər işinin istintaqı təzələndi
